ប្រធានអនុសាខាកាកបាទក្រហមកម្ពុជាស្រុកស្ទោង ណែនាំដល់អាជ្ញាធរភូមិ ឃុំ ត្រូវយកចិត្តទុកដាក់ដល់កុមារកំព្រា និងគ្រួសារក្រីក្រនៅក្នុងមូលដ្ឋានរបស់ខ្លួន

    (កំពង់ធំ)÷  លោក សាយ គឹមឡម  បានធ្វើការណែនាំដូច្នេះនៅក្នុងឱកាសដែលលោកនិងសហការីបានអញ្ជើញចុះសួរសុខទុក្ខនិងចែកអំណោយ ជូនកុមារកំព្រា ស្ត្រីមេម៉ាយ និងគ្រួសារទីទ័លក្រចំនួន៦គ្រួសារ នៅឃុំសំព្រោជ រសៀលថ្ងៃទី០២ ខែសីហា ឆ្នាំ២០២៤។

     ក្នុងឱកាសនេះដែរ លោកបានពាំនាំផ្ដាំផ្ញើសាកសួរសុខទុក្ខរបស់ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ និងលោកជំទាវ ដែលឯកឧត្តមតែងតែគិតគូរយកចិត្តទុកដាក់ដល់សុខទុក្ខប្រជាពលរដ្ឋគ្រប់មូលដ្ឋាននិងគ្រប់ពេលវេលា។

    ជាមួយនេះផងដែរលោក បានណែនាំដល់អាជ្ញាធរភូមិ/ឃុំ ត្រូវយកចិត្តទុកដាក់ខ្ពស់ដល់សុខទុក្ខសុខុមាលភាព ជីវភាពគ្រួសារក្រីក្រដើម្បីជួយគាត់ឲ្យបានទាន់ពេលវេលា ហើយត្រូវចុះជួបជួយផ្ទាល់ដល់តាមគ្រួសារ នៅតាមខ្នងផ្ទះ ហើយជៀសវាងធ្វើជាមន្ត្រីជើង១០ ហើយមិនព្រមស្វែងយល់ពីសុខទុក្ខប្រជាពលរដ្ឋរបស់ខ្លួននៅក្នុងមូលដ្ឋាន។

     លើសពីនេះលោក សាយ គឹមឡម អភិបាលស្រុកស្ទោង បានណែនាំដល់ប្រជាពលរដ្ឋនៅក្នុងមូលដ្ឋាន សូមមានការប្រុងប្រយ័ត្ន និងចេះថែរក្សាសុខភាពបង្ការខ្លួនពីជំងឺឆ្លងផ្សេងៗ ត្រូវសម្រាកនៅក្នុងមុង ហើយបើមានអាការ:ខុសប្រក្រតីសូមអញ្ជើញទៅជួបគ្រូពេទ្យនៅក្នុងមន្ទីរពេទ្យដែលជិតបំផុតដើម្បីប្រឹក្សានិងព្យាបាល ហើយត្រូវមានការប្រុងប្រយ័ត្នកូនចៅមិនឱ្យនៅផ្ទះតែឯង ឬចុះលេងទឹកផ្ដេសផ្ដាសដែលអាចបង្កនូវការលិចលង់ជាយថាហេតុ។

     សូមបញ្ជាក់ថា កុមាកំព្រា និងប្រជាពលរដ្ឋទាំង៦គ្រួសារក្នុងមួយគ្រួសារៗទទួលបាននូវ÷ អង្ករ០១បេ មី១កេស ទឹកស៊ីអ៊ីវ០១យួរ និងត្រីខរ០១យួរ។ អត្ថបទរដ្ឋបាលស្រុកស្ទោង-ពិនិត្យដោយអ៊ុមញឹប។