រដ្ឋបាលខេត្តកំពង់ធំ រៀបចំកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្ត អាណត្តិទី៤

(កំពង់ធំ)៖ ឯកឧត្តម ដៀប ពីរី ប្រធានក្រុមប្រឹក្សាខេត្តឯកឧត្តម ញឹក បានខេង អភិបាលរងខេត្ត តំណាងខ្ពង់ខ្ពស់ឧត្តម នួន ផារ័ត្ន ភិបាលខេត្តកំពង់ធំ បានដឹកនាំកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្តកំពង់ធំ អាណត្តិទី៤ នាព្រឹកថ្ងៃទី០៨ ខែមេសា ឆ្នាំ២០២៥ នៅសាលប្រជុំសាលាខេត្តកំពង់ធំ។

ឯកឧត្តម ដៀប ពីរី បានមានប្រសាសន៍ថា ការប្រជុំនាពេលនេះ ដើម្បីឱ្យមានប្រសិទ្ធភាពខ្ពស់ត្រូវតែមានរបៀបវារៈនៃកិច្ចប្រជុំមាន៖ ១- ពិនិត្យ និងអនុម័ត កំណត់ហេតុនៃកិច្ចប្រជុំសាមញ្ញលើកទី១០ របស់ក្រុមប្រឹក្សាខេត្ត។ ២- ពិនិត្យ និងអនុម័ត របាយការណ៍ប្រចាំខែមីនា ឆ្នាំ២០២៥ របស់រដ្ឋបាលខេត្ត។ ៣- បញ្ហាផ្សេងៗ

ឯកឧត្តមប្រធានក្រុមប្រឹក្សាខេត្ត បានបន្តទៀតថា ខេត្តកំពង់ធំមានការរីកចម្រើនជាបណ្ដើរៗ ក្រោមការដឹកនាំរបស់ឯកឧត្តម នួន ផារ័ត្ន អភិបាលខេត្តកំពង់ធំ មានការអភិវឌ្ឍ មានសោភ័ណភាពស្រស់ស្អាត មានការតុបតែងនៅតាមដងស្ទឹងសែន មន្ទីរអង្គភាព តាមក្រុង/ស្រុក និងទីវត្តអារាម នាឱកាសបុណ្យចូលឆ្នាំថ្មីប្រពៃណីជាតិខាងមុខនេះ ដើម្បីទាក់ទាញភ្ញៀវជាតិ អន្តរជាតិមកទស្សនាកម្សាន្ត ព្រមទាំងមានរក្សាសន្តិសុខសណ្តាប់ធ្នាប់សាធារណៈរបស់កងកម្លាំងទាំង៣ ជូនបងប្អូនប្រជាពលរដ្ឋមកទស្សនាកម្សាន្តទាំងពេលយប់ និងពេលថ្ងៃនៅក្នុងខេត្តកំពង់ធំមានភាពសប្បាយរីករាយ។

តាមរយៈកិច្ចប្រជុំនេះឯកឧត្តម សូមអំពាវនាវដល់បងប្អូនប្រជាពលរដ្ឋ និងភ្ញៀវទេសចរណ៍ទាំងអស់ សូមចូលរួមថែរក្សា និងទុកដាក់សំរាមឱ្យមានសណ្ដាប់ធ្នាប់ល្អ ចៀសវាងកុំចោលសំរាមផ្ដេសផ្ដាស ធ្វើឱ្យប៉ះពាល់ដល់បរិស្ថាន។

ឯកឧត្តម ញឹក បានខេង អភិបាលរងខេត្តកំពង់ធំ បានថ្លែងថាចំពោះកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្ត អាណត្តិទី៤ ប្រកបដោយប្រសិទ្ធភាពខ្ពស់ ដោយក្រុមការងារបានយកចិត្តទុកដាក់ទៅលើរបាយការណ៍ ស្ដីពីការអនុវត្តការងារបងរដ្ឋបាលខេត្តប្រចាំខែមីនា ឆ្នាំ២០២៥ មានភាពច្បាស់លាស់ត្រឹមត្រូវ នឹងត្រូវអនុវត្តបន្តទៀតនៅខែមេសាឱ្យមានលក្ខណៈច្បាស់លាស់។  សម្រាប់សង្ក្រាន្តខេត្តកំពង់ធំឆ្នាំ២០២៥ នាពេលខាងមុខនេះ សូមឱ្យមន្ទីរអង្គភាពក្រុងស្រុកទាំងអស់ ចូលរួមផ្សព្វផ្សាយបន្ថែមទៀត សហការគ្នាមកកំសាន្តសប្បាយឱ្យបានច្រើនកុះករ ដើម្បីលើកស្ទួយនៅប្រពៃណីជាតិខ្មែរ។ អត្ថបទលោក ធូ កែវមុនី-ពិនិត្យដោយអ៊ុមញឹប។