របាំងស្បៃមុងជាឧបករណ៍នេសាទ ដែលច្បាប់បានហាមឃាត់ដាច់ខាត ត្រូវបានកងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បន្តបង្ក្រាប នៅលើផ្ទៃបឹងទន្លេសាប ក្នុងឃុំផាត់សណ្ដាយ នៅថ្ងៃឈប់សម្រាក

(កំពង់ធំ)÷ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ  បានបញ្ជាក់ថា ដោយអនុវត្តតាមបទបញ្ជាដ៍ម៉ឺងម៉ាត់ របស់ឯកឧត្តមនាយឧត្តមសេនីយ៍ ម៉ៅ សុផាន់អគ្គមេបញ្ជាការរងនៃកងយោធពលខេមរៈភូមិន្ទ មេបញ្ជាការកងទ័ពជើងគោក ក្នុងកិច្ចប្រជុំពិសេសនៃគណៈបញ្ជាការឯកភាពបង្ក្រាបបទល្មើសនេសាទខុសច្បាប់ក្នុងភូមិសាស្ត្របឹងទន្លេសាប នៅសាលាខេត្តពោធិ៍សាត់ នាពេលថ្មីៗកន្លងទៅនេះ  និងការផ្ដល់មតិណែនាំអំពីការអនុវត្តផ្លូវច្បាប់ស្ដីពីជលផលរបស់លោក ជិន សុីថា នាយខណ្ឌជលផល នៃមន្ទីរកសិកម្មរុក្ខាប្រមាញ់និងនេសាទខេត្តកំពង់ធំ។

 នៅថ្ងៃទី ២៩ ខែមីនាឆ្នាំ ២០២៥ កងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានបន្តចេញធ្វើសកម្មភាពដោយមិនគិតពីថ្ងៃឈប់សម្រាក ដើម្បីបង្ក្រាបឧបករណ៍នេសាទខុសច្បាប់ ដែលជនល្មើសនៅតែលួចដាក់បំពាន នៅក្នុងតំបន់បឹងទន្លេសាប ក្នុងឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ  ។

លោកវរៈសេនីយ៍ទោ សេង សំអុល នាយសេនាធិការរង និងជាមេបញ្ជាការកងកម្លាំងអន្តរាគមន៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលកំពុងប្រចាំការនៅទីបញ្ជាការស្រាលតំបន់ព្រែកធ្លក ក្នុងឃុំផាត់ សណ្ដាយ ស្រុកកំពង់ស្វាយ បានបញ្ជាក់ថា ឧបករណ៍ស្បៃមុងខុសច្បាប់ ដែលក្រុមជនល្មើសលួចដាក់នៅពេលយប់ ហើយត្រូវបានកងកម្លាំងអន្តរាគមន៍ម្ចាស់ការបង្ក្រាបបាននៅថ្ងៃទី២៩ ខែមីនា ឆ្នាំ២០២៥  នេះមានចំនួន២១ របាំង មានប្រវែងជិតមួយពាន់ម៉ែត្រ  បង្គោលរបាំងឈើចំនួនប្រមាណ ជាង៨០០ ដើម ឡុកស្បែកមុងចំនួន ៤២ ឡុក និងលបលូ ស្បៃមុងចំនួន៤២ មាត់ ព្រមទាំងបានចាក់លែងកូនត្រីចម្រុះមួយចំនួនចូលទៅក្នុងបឹងទន្លេសាបវិញ។

  ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ សមាជិកគណៈបញ្ជាការឯកភាពបង្ក្រាបបទល្មើសនេសាទក្នុងភូមិសាស្ត្របឹងទន្លេសាប បានប្ដេជ្ញាចិត្តដាច់ខាត អនុវត្តឱ្យមានប្រសិទ្ធភាព តាមបទបញ្ជារបស់ប្រមុខរាជរដ្ឋាភិបាលនៃព្រះរាជាណាចក្រកម្ពុជា និងបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរៈភូមិន្ទ ព្រមទាំងការណែនាំផ្ទាល់របស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ក្នុងការបន្តបង្ក្រាបបទល្មើសនេសាទ  ខុសច្បាប់ ឲ្យទទួលបានជោគជ័យ ដើម្បីថែរក្សាធនធានមច្ឆជាតិ សម្រាប់បម្រើឲ្យសេចក្តីត្រូវការរបស់ប្រជាជននៅទូទាំងប្រទេស និងកូនចៅយើងនៅជំនាន់ក្រោយៗទៀត។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។