លោកជំទាវ ស៊ឹម សុវណ្ណារិទ្ធិ ជំរុញឱ្យមន្ត្រីពាក់ព័ន្ធត្រូវពង្រឹងសមត្ថភាពខ្លួនដើម្បីការងារស្ត្រី កុមារ និងជនងាយរងគ្រោះនៅតាមមូលដ្ឋាន

(កំពង់ធំ)៖លោកជំទាវ ស៊ឹម សុវណ្ណារិទ្ធិ ប្រធានគណៈកម្មាធិការពិគ្រោះយោបល់កិច្ចការងារស្ត្រី និងកុមារខេត្តកំពង់ធំ ជំរុញឱ្យ
មន្ត្រីពាក់ព័ន្ធត្រូវពង្រឹងសមត្ថភាពខ្លួនដើម្បីការងារស្ត្រី កុមារ និងជនងាយរងគ្រោះនៅតាមមូលដ្ឋាន ។
លោកជំទាវ ស៊ឹម សុវណ្ណារិទ្ធិ បានថ្លែងក្នុងកិច្ចប្រជុំសាមញ្ញ គ.ក.ស.ក ខេត្តកំពង់ធំ នៅថ្ងៃទី២៨ ខែមីនា ឆ្នាំ២០២៥ នៅសាលាខេត្តកំពង់ធំ ដោយមានការអញ្ជើញចូលរួមពីលោក លោកស្រី តាមបណ្ដាលអង្គភាពមន្ទីរជាច្រើនរូប។
លោកស្រីលើកថាក្រោមការដឹកនាំដ៏ឈ្លាសវៃរបស់រាជរដ្ឋាភិបាលកម្ពុជា ដែលមានសម្តេចបវរធិបតី ហ៊ុន ម៉ាណែត ជានាយករដ្ឋមន្ត្រីបានធ្វើឱ្យមានសុខសន្តិភាពពេញលេញធ្វើឱ្យស្ថានភាពសង្គមមានលក្ខណៈល្អប្រសើរ កុមារត្រូវបានលើកស្ទួយ និងគោរពសិទ្ធិជាមូលដ្ឋានទាំងបួន មានលក្ខណៈល្អប្រសើរជាលំដាប់ ។
លោកជំទាវបានបន្តថាក្រុមការងារត្រូវរៀបចំផែនការកិច្ចការពារស្រ្តីកុមារ សម្រេចបានលទ្ធផលជោគជ័យតាមសូចនាករកំណត់ អាស្រ័យដោយអ្នកមានភារកិច្ច និងការទទួលខុសត្រូវក្នុងការអនុវត្តទាំងអស់ បង្កើនការយល់ដឹង និងមានឆន្ទៈក្នុងការប្រតិបត្តិសំដៅធ្វើឱ្យស្ត្រីកុមារ និងជនងាយរងគ្រោះនៅក្នុងខេត្ត ទទួលបាននូវកិច្ចការពារប្រកបដោយសមធម៌ពីទម្រង់ផ្សេងៗ ដែលនាំឱ្យប៉ះពាល់ជាអវិជ្ជមានដល់ផ្នែកអារម្មណ៍ ផ្លូវចិត្ត ផ្លូវកាយ ផ្លូវភេទ និងការមិនអើពើ ការរើសអើង ដែលជាសិទ្ធិរបស់ស្ត្រី កុមារគ្រប់រូបត្រូវទទួលបានដូចៗគ្នា ក្នុងចំណោមសិទ្ធិជាមូលដ្ឋានចម្បងទាំង៤ របស់កុមារ គឺ «ការរស់រានមានជីវិត, ការអភិវឌ្ឍ, ការចូលរួម, និងការការពារ» ដោយយើងគ្រប់គ្នាត្រូវកំណត់ក្នុងបេះដូងថា ស្ត្រីកុមារជាទំពាំងស្នងឫស្សីជាអ្នកបន្តវេន ស្ត្រី កុមារជាធនធានមនុស្សសម្រាប់អនាគតប្រទេសជាតិ។
លោកជំទាវបញ្ជាក់ថាចំពោះបញ្ហាសន្តិសុខសង្គមស្នើសុំអោយខាងកងកម្លាំងទាំងបីដែលជាសមាជិកគណៈកម្មាធិការពិគ្រោះយោបល់កិច្ចការស្ត្រីនិងកុមារ បន្តការងារស៊ើបអង្កេតស្រាវជ្រាវករណីដែលនៅសេសសល់ បង្កើនកិច្ចសហការជាមួយអង្គការ ពាក់ព័ន្ធដើម្បីជួយជនរងគ្រោះនឹងមានចំណាត់ការតាមនីតិវិធីច្បាប់និងបន្តធ្វើការផ្សព្វផ្សាយច្បាប់ស្ដីអំពីការបង្ក្រាបអំពើជួញដូរមនុស្ស និងការធ្វើអាជីវកម្មផ្លូវភេទ ច្បាប់ចរាចរណ៍ផ្លូវគោក ច្បាប់គ្រឿងញៀន ច្បាប់ស្ដីពីការទប់ស្កាត់អំពើហិង្សាក្នុងគ្រួសារនិងកិច្ចការពារជនរងគ្រោះ ព្រមទាំងផ្សាយអំពីយុទ្ធនាការទប់ស្កាត់ក្មេងទំនើង ដែលរដ្ឋាភិបាលកំពុងតែផ្ដោតការយកចិត្តទុកដាក់ដើម្បីរក្សាសន្តិសុខនិងសណ្ដាប់ធ្នាប់សាធារណៈ ដើម្បីទទួលបានភូមិឃុំមានសុវត្ថិភាព ។
លោកជំទាវបានស្នើសុំឲ្យមន្ទីរផែនការបន្តចុះតាមដាននិងសម្របសម្រួលការងារអត្តសញ្ញាណកម្មគ្រួសារក្រីក្រតាមភូមិឃុំសង្កាត់បន្តទៀតនិងស្នើឲ្យសមាគមក្រុមប្រឹក្សាថ្នាក់មូលដ្ឋានមានការរៀបចំវគ្គបណ្ដុះបណ្ដាលដល់គណៈកម្មាធិការពិគ្រោះយោបល់កិច្ចការស្ត្រីនិងកុមារគ្រប់ ទាំង ៩ ក្រុង ស្រុកដើម្បីឲ្យពួកគាត់ទទួលបាននូវចំណេះដឹងបន្ថែមទាក់ទងទៅនឹងតួនាទីភារកិច្ចនិងឲ្យគាត់ចេះគ្រោងផែនការសកម្មភាពនិងផែនការថវិកា ដើម្បីមានលទ្ធភាពគ្រប់គ្រាន់ក្នុងការអនុវត្តនូវសកម្មភាពនៅក្នុងឆ្នាំ ២០២៥។
លោកជំទាវបញ្ជាក់ថាក្នុងកិច្ចប្រជុំបានពិនិត្យនិងអនុម័តកំណត់ហេតុកិច្ចប្រជុំរបស់គកសក ខែកុម្ភៈ ២០២៥ ពិនិត្យរបាយការណ៍របស់របស់ស្ថានភាពស្ត្រីយុវវ័យ កុមារ ជនងាយរងគ្រោះ តាមមន្ទីរវិស័យដែលពាក់ព័ន្ធនឹងវិស័យអប់រំ វិស័យសុខាភិបាល អនាម័យទឹកស្អាត សន្តិសុខស្បៀង សង្គមកិច្ច ពលកម្មកុមារ សមភាពយេនឌ័រ និងសន្តិសុខសណ្ដាប់ធ្នាប់សាធារណៈ ក្នុងខែមិនា ឆ្នាំ ២០២៥ ។ ពង្រឹងកិច្ចសហការរវាងសមាជិកគណៈកម្មាធិការ ពិគ្រោះយោបល់កិច្ចការស្ត្រីនិងកុមារ ជាច្រកចេញចូលតែ១ ថែមទាំងសហការជាមួយនឹងអង្គការដៃគូ មានអង្គការ wold vision (អង្គការទស្សនៈពិភពលោក) អង្គការ Home ( អង្គការជួយជនទុរគត និងចាស់ជរា )និង CWCC (អង្គការជួយស្ត្រីមានវិបត្តិ ) ធ្វើកិច្ចការជួយលើជនរងគ្រោះ ជនងាយយរងគ្រោះ និងការផ្ដល់សេវាសង្គមរួមគ្នាឲ្យបានកាន់តែមានប្រសិទ្ធភាព និងសមភាពយេនឌ័រ ។